Почина партнерот на Сандра Булок на 57-годишна возраст, тајно боледуваше од АЛС

Почина Брајан Рендал. Долгогодишниот партнер на Сандра Булок издиша за последен пат на 57-годишна возраст.

Познатиот фотограф три години тајно боледуваше од АЛС (Амиотрофична латерална склероза).

Тажната вест беше потврдена за списанието People.

„Со голема тага споделуваме дека на 5 август, Брајан Рендал почина мирно по 3-годишна борба со АЛС. Брајан избра да го чува во тајност неговото патување со АЛС и ние што се грижиме за него направивме сè што можевме за да го почитуваме неговото барање“ – стои во соопштението.

Брајан и Сандра се запознаа во јануари 2015 година, а по неколку месеци ја открија нивната врска пред јавноста.

Булок има две посвоени деца, кои ги растеше заедно со Рендал. „Ја најдов љубовта на мојот живот. Ние имаме две прекрасни деца – три деца со ќерката на Рендал. Мене не ми треба хартија за да бидам посветена партнерка или посветена мајка“ – изјавила Булок во 2021 година, алудирајќи на фактот што официјално не беа во брак.