Почина Мишо Ковач: Замолкна гласот на „Ostala si uvijek ista“, останаа песните за цел живот

Почина Мишо Ковач, еден од најсаканите пејачи на поранешните југословенски простори.

Легендарниот хрватски музичар, чии песни со децении беа дел од љубовните приказни, славењата и тагите на генерации, почина во Сплит на 85-годишна возраст.

Зад себе остави песни кои публиката ги знаеше од првиот стих и концертна слика по која ќе остане запаметен: раширени раце, спуштен микрофон и илјадници гласови кои пееја наместо него.

Роден како Мате Ковач на 16 јули 1941 година во Шибеник, Мишо ја започна музичката кариера во 60-тите години. Првиот голем успех го постигна во 1969 година со „Više se nećeš vratiti“, песната со која започна неговата долгогодишна соработка со Ѓорѓе Новковиќ.

Две години подоцна, со „Proplakat će zora“ победи на Сплитскиот фестивал, зацврстувајќи го своето место меѓу најпопуларните пејачи во Југославија.

„Ostala si uvijek ista“, „Ako me ostaviš“, „Svi pjevaju, ja ne čujem“, „Dalmacija u mom oku“, „Ti si pjesma moje duše“... Неговите хитови ги надживеаја плочите на кои беа објавени и продолжија да наоѓаат нови слушатели. Во текот на кариерата продаде повеќе од 20 милиони плочи, касети и компакт-дискови.

Зад големите музички успеси стоеше живот обележан и со тешки загуби. Во 1992 година го загуби синот Еди, трагедија која длабоко го погоди и по која најавуваше повлекување од сцената. Сепак, ѝ се враќаше на музиката и на публиката, снимаше нови албуми и настапуваше пред полни сали.

Посебно место во неговата подоцнежна кариера имаа дуетите со ќерката Ивана, меѓу кои „Nema mi do tebe nikoga“ и „Tvoja mala“. Во сопругата Лидија, со која се венча во 2002 година, имаше голема поддршка за закрепнувањето и враќањето на сцената.

Во 2012 година ја доби наградата „Порин“ за животно дело, признание за музичка кариера која остави длабока трага во регионот.

За многумина, неговите песни остануваат врзани за некој сакан човек, за спомен од младоста или за вечер во која се пеело со цело срце.