Ози Озборн почина на 76 години. Неговото семејство ја потврди тажната вест со кратко соопштение:
„Со тага која е поголема одошто може да се изрази со зборови, мораме да известиме дека нашиот сакан Ози Озборн почина утрово. Тој беше со семејството, опкружен со љубов. Бараме од сите да ја почитуваат нашата приватност во овој период“.
Пред само три недели, Принцот на темнината настапи на неговиот последен концерт во Бирмингем со кој се збогуваше со фановите. Поради битката со Паркинсонова болест, најголем дел од концертот тој седеше на трон.
„Не знаете како се чувствувам, ви благодарам од дното на срцето“ – ѝ рече легендарниот музичар на публиката.
Ози се прослави како основач и водечки вокал на Black Sabbath. Тие се сметаат за пионери на хевиметалот со хитови како „Paranoid“, „War Pigs“ и „Iron Man“. Откако си замина од бендот поради несогласувања со другите членови, тој продолжи со успешна соло кариера.
Неговите енергични и контроверзни настапи уште повеќе му ја зголемија славата. За време на еден од концертите во 1982 година, тој со забите откина глава на лилјак за кој мислеше дека е гумен.
Со помош на неговата сопруга Шерон тој се ослободи од канџите на дрогата и на почетокот на 2000-тите години, снимија ТВ серија со семејството. Во „The Osbournes“ ѕвезди беа и неговите две деца – Кели и Џек, а нивната ќерка Ејми одби да биде ескпонирана.
Концертен филм за Ози и Black Sabbath ќе биде објавен следната година.
