Мира Фурлан издиша за последен пат на 65-годишна возраст.
Тажната вест беше објавена на нејзиниот официјален Twitter профил, но не беше наведена причината за смртта.
— Mira Furlan (@FurlanMira) January 22, 2021
Режисерот Мајкл Стразински ја потврди веста дека Мира го напушти овој свет.
„Ова е ноќ на голема тага, бидејќи нашата пријателка и другарка тргна по патот по кој не можеме да ја стигнеме. Но, како што е за сите работи, со текот на времето ќе ја достигнеме и верувам дека ќе има многу приказни да ни раскаже и многу нови улоги да ги сподели со универзумот“ – напиша креаторот на „Babylon 5“.
Легендарната југословенска актерка е родена во Загреб, но на почетокот од 90-тите години се пресели во САД. Таму таа изгради светска кариера со својата улога во хит сериите „Lost“ и „Babylon 5“.
Актерската кариера, Мира ја започна во Хрватскиот народен театар и беше дел од него сè до нејзиното заминување во САД. Во 80-тите години, Фурлан стана една од најпознатите хрватски, но и југословенски актерки.
Таа ќе остане запаметена по улогите во филмовите „Киклоп“, „Во вилиците на животот“, „За среќа се потребни тројца“ и многу други.
