„Плачевме секој ден“: Марк Кукуреља ќе игра во финалето на СП откако сподели дека синчето има аутизам
Марк Кукуреља в недела ќе има можност со Шпанија да стане светски шампион, но зад неговите успеси на фудбалскиот терен се крие лична приказна која ги трогна луѓето ширум светот.
27-годишниот бек неодамна во искрено интервју се отвори за својот најстар син Матео, кој има аутизам.
Кукуреља и неговата партнерка Клаудија Родригез се родители на три деца, а дијагнозата на синчето целосно им го промени животот и приоритетите.
„Многу ми е тешко затоа што понекогаш не знам како да му помогнеме. Кога ќе видам дека има потешкотии, страдам и јас. Тоа е тема која ме прави многу емотивен“ – рече Кукуреља во интервјуто за YouTube-каналот PauPautista, едвај задржувајќи ги солзите.
Најтешкиот период за нивното семејство бил веднаш по дијагнозата, кога не знаеле како да му помогнат на синот. Емотивната мајка зборуваше за моментите кога се адаптирале на потребите на синчето.
„Видовме дека некои работи се различни со другите деца. Не добивме многу помош од училиштето и секој ден ги минувавме најлошите месеци. Одевме заедно да го однесеме Матео, јас бев бремена со Рио. Ќе се вратевме дома и секој ден плачевме“ - рече Клаудија.
Со текот на времето, научиле дека секое дете со аутизам е различно и дека најважно е да му се обезбеди поддршка и средина во која ќе може да се развива со свое темпо.
„Моравме да научиме многу. Матео нé учи на многу нешта. Мораш постојано да мислиш на него. Понекогаш сакаме да правиме нешто и не можеме, бидејќи не е добро за него“ – изјавија родителите.
Марк е категоричен дека при секоја важна животна одлука, па дури и кога размислува за трансфер во нов клуб, прво проверува дали во градот постојат соодветни училишта и центри за терапија за Матео.
„Денес не би отишле во клуб во град каде што нема училишта или каде што не можеме да најдеме нешто што ќе одговара на потребите на мојот син. Тоа е дел од нашиот живот и мислам дека, пред фудбалот, најважно е семејството да биде добро и да се чувствува удобно“ – изјави тој.
🔊 "Siempre que algún equipo se ha interesado, nosotros de las primeras cosas que hacemos es mirar si hay colegios o terapias para mi hijo"
👨👩👧👦 Marc Cucurella, sobre la importancia de buscar la comodidad para su familia y su hijo con autismo#Cucurella #Autismo #RealMadrid pic.twitter.com/yrWQFGsBto— Radioestadio Noche (@RadioestadioN) June 25, 2026
Неговата исповед предизвика голем број реакции на социјалните мрежи, а многу родители на деца со аутизам му се заблагодарија што јавно проговори за предизвиците со кои се соочуваат, помагајќи да се подигне свеста и да се поттикне поголемо разбирање и инклузија.
