Бијонсе е најубава жена за 2012 година. Списанието People, кое минатата година оваа титула ѝ ја додели на Џенифер Лопез, годинава одлучи со признанието да ја удостои 30-годишната пејачка која неодамна стана мајка.
„Се чувствувам поубава отсекогаш затоа што родив“ – изјавила Бијонсе.
Славната пејачка која е во брак со Џеј-Зи, пред помалку од четири месеци ја роди нивната прва ќерка, Блу Ајви. „Таа е најслаткото нешто“ – признала Бијонсе во интервјуто за People и дополнила дека редовно ѝ пее песни на малата Блу Ајви.
На прашањето на кого личи бебето, добитничката на 16 Греми награди одговорила: „Таа личи на Блу. Таа е своја личност. Најубавото нешто во тоа да имаш девојче е што имаш вистинско наследство. Зборот љубов сега има сосема поинакво значење“.
Новата најубава жена на светот открила и дека толку многу ужива во мајчинството, што го сака менувањето на пелени.
