Олимпиец освои бронза, па пред цел свет призна дека ја изневери девојката: „Имав златен медал и го изгубив, направив глупост“
Олимпиецот Стурла Холм Легрејд приреди еден од најемотивните моменти на Зимските олимписки игри 2026, но не поради спортски подвиг, туку поради лична исповед која ја шокираше јавноста.
Само неколку минути по освојувањето на бронзениот медал во индивидуалната трка на 20 километри, 28-годишниот норвешки биатлонец се расплака во живо на норвешката телевизија NRK и призна дека ја изневерил својата девојка.
Има една личност со која сакав да го споделам ова, која можеби не гледа денес. Пред шест месеци, ја запознав љубовта на мојот живот, најубавата и најдобрата личност на светот. А пред три месеци, ја направив најголемата грешка во животот и ја изневерив – изјави Легрејд со треперлив глас.
Тој откри дека ѝ признал за неверството пред една недела, но оттогаш не добил никаква реакција од неа.
Ова е најлошата недела во мојот живот. Имав златен медал во животот... Имам очи само за неа. Спортот во изминативе денови е на второ место. Посакувам да можев да го споделам ова со неа – рече тој.
Легрејд објасни дека чувствувал потреба јавно да ја признае грешката затоа што сакал да биде добар пример.
Се обидувам да бидам добар пример, а направив глупост. Мораш да признаеш кога ќе направиш нешто погрешно и ќе ја повредиш личноста која најмногу ја сакаш – рече биатлонецот и додаде: Немам што да изгубам.
Подоцна на прес-конференција, Стурла призна дека сè уште нема никаква реакција од девојката.
Можеби не го видела интервјуто. Се надевам дека не направив да ѝ биде полошо – рече тој.
Стурла доби спротивставени коментари за своето искрено признание. Додека дел од јавноста го пофали за искреноста и храброста, други го критикуваа дека ваквите признанија не се прават пред милионска публика.
И покрај личната драма, Легрејд повторно ќе настапи на 20 февруари.
