Официјално: Од утре полицискиот час ќе започнува на полноќ, кафулињата и рестораните ќе работат до 23.30 часот

На денешната седница на Владата беше донесена одлука за повторно олабавување на мерките за заштита и спречување на ширењето на коронавирусот.

Врз основа на епидемиолошките текови и состојби во државата и намалувањето на бројот на хоспитализирани и заразени лица, беа усвоени следните мерки:

• Почнувајќи од утре (12 мај 2021 година), забраната и посебниот режим на движење на населението и возилата од јавен превоз да почнува од 24 часот до 4 часот наутро.
• Соодветно на тоа, дозволено време за работа на угостителските објекти за работа со посетители/гости во отворениот дел од угостителскиот објект (само летни тераси, градини, а не во затворениот дел) е до 23.30 часот.

• Сите настани и ивенти може да се одржуваат согласно наменските протоколи, со исполнетост до 30% од капацитетот на затворениот простор.
• Се менуваат протоколите и за детските градинки, односно се дозволува зголемување на бројот на деца од 15 на 20 во една група.
• Вежбалните, фитнес центрите и теретаните започнуваат со вршење на својата дејност во објектите.
• Се дозволува користење на годишните одмори за здравствените работници.

Овие мерки ќе важат до 18 мај 2021 година.