Светот се обединува за да каже КРАЈ на насилството врз жените. Со глобалната порака #HearMeToo започна кампањата „16 дена на активизам за спречување на насилството врз жени и девојчиња“, која ќе трае до 10 декември, односно Денот на човековите права.
Целта на кампањата е зголемување на свеста и преземање на конкретни мерки за прекинување на насилството врз жените и девојчињата.
„Независно дали е дома, на улиците, или за време на војна, насилството врз жените е прекршување на човековите права од пандемски размери кое се случува јавно и приватно. Насилството врз жените и девојчињата се манифестира во физички, сексуални и психички форми“ – информира UN Women.
Обединетите Нации го прогласија 25 ноември за Меѓународен ден за борба против насилство врз жените, инспирирани од бруталното убиство на сестрите Мирабал, политички активистки во Доминиканската Република во 1960 година.
Кампањата „Обој го светот во портокалово“ подразбира најразлични активности како дебати, симболични собири, осветлување на важни споменици и објекти во портокалово светло.
Портокаловата боја ја симболизира светлата и оптимистичка иднина во која нема насилство врз припадничките на понежниот пол.
