„Ниту барав, ниту мене ми се доделени пари“: Слаткар по бурните реакции сподели дека филмот за неговиот живот ќе се снима БЕЗ одобрените средства
Одлуката на Агенцијата за филм да поддржи документарен филм за животот на Марко Маринковиќ - Слаткар деновиве предизвика бурни реакции на социјалните мрежи и поделени мислења. Додека едни сметаа дека филм за урбана икона која влијаеше на цели генерации е оправдан проект, други упатија критики, сметајќи дека државните буџетски средства треба да се насочат кон поинакви филмски остварувања.
По ваквите реакции, се огласи и популарниот рапер:
„Ниту барав, ниту мене ми се доделени пари... Не сакам проектот кој зборува за разбирање, прифаќање и поддршка да започне со поделби“ - напиша тој, откривајќи дека тимот одлучил да го реализира филмот БЕЗ одобрените државни средства.
Слаткар најави дека приказната сепак ќе се раскаже со помош на пријателите и публиката, завршувајќи со моќната порака: „Светот ќе го чуе гласот на најтивките“.
Пораката на македонскиот музичар ви ја пренесуваме во целост:
Деновиве читам секакви коментари и вести. И повторно гледам колку лесно судиме, а половично знаеме или воопшто не знаеме.
Сакам една работа да биде јасна... ниту барав, ниту мене ми се доделени пари.
Поддршка доби документарен филм и еден многу посветен тим кој веќе две години работи на приказна што преку мојот живот зборува за многу повеќе од мене.
И искрено сум благодарен на Комисијата од @filmagency.northmacedonia која ја препозна важноста на оваа тема. Но, не сакам проектот кој зборува за разбирање, прифаќање и поддршка да започне со поделби.
Затоа одлучивме филмот да се реализира без средствата доделени од Агенцијата за филм.
Продолжуваме понатаму… Заедно со сите наши поддржувачи, соработници и пријатели на кои сум им неизмерно благодарен.
И со најважната поддршка од вас луѓето кои ме сакаат, почитуваат и ценат ❤️
Светот ќе го чуе гласот на најтивките 💯
Се гледаме на премиера.
На социјалните мрежи се огласи и сопругата на Слаткар, Сања Николиќ. Таа напиша: „А приказната зад камерите е поинаква... секогаш искрена, но понекогаш доста тешка. И тој... еден и свој“.
