„Никогаш не сум била вака вљубена“: Адел се отвори за плановите за деца и брак со Рич Пол

Адел е ѕвездата од насловните страници на американското и британското издание на Elle.

34-годишната музичарка, која наскоро ќе ги одржи одложените концерти во Лас Вегас, сними едиторијали во парчиња од брендови како Saint Laurent, Fendi, Pologeorgis, Levi’s, Givenchy и Marc Jacobs. Марио Соренти ги потпишува фотографиите.

Во интервјуто за Elle, Адел зборуваше за плановите за заедничка иднина со момчето Рич Пол и за проширување на семејството.

На прашањето дали сака повторно да се омажи по пропаѓањето на бракот со Сајмон Конеки, Адел одговорила: „Да, апсолутно“.

„Никогаш не сум била вака вљубена. Опседната сум со него... Можеби и ќе се омажам. Дефинитивно сакам уште деца“ – рекла таа.

За одложените настапи во Лас Вегас, Адел призна дека била засрамена и дека се чувствувала ужасно, но дека воопшто не ѝ се допаѓала атмосферата и сцената.

„Бев посрамотена. Започнав да се кријам. Тоа беше најлошиот момент во мојата досегашна кариера. Бев многу возбудена за тие концерти. Беше разочарувачко“ – рече таа.

„Немаше душа во сето тоа. Сценската поставеност не беше правилна. Недостасуваше интимност“ – дополни Адел.

Адел и Рич започнаа да се состануваат во 2021 година. Истата година беше финализиран разводот со Сајмон, со кого има еден син.