„Никогаш не сум била посреќна“: Емотивен разговор на Цеце Николова со својата помлада верзија која носи перика поради алопеција
Цеце Николова сподели емотивно видео во кое разговара со помладата верзија од себе и ѝ кажува како ѝ се променил животот во изминатите 10 години.
Додека пред една деценија македонската водителка ја криела борбата со алопеција носејќи перика, сега гордо зборува за неа пред светот, инспирирајќи ги луѓето да се прифаќаат онакви какви што се.
Во видеото, таа ѝ раскажува на „скршената“ 18-годишна Цеце дека сега се сака онаква каква што е, дека гради успешна кариера и дека луѓето ја обожаваат.
На прашањето како решила да ја извади периката од главата и да се покаже пред светот во својата вистинска верзија, Цеце вели:
Едно сабајле станав и решив дека не можам повеќе да се кријам. Се изморив...
А како ќе реагираш ти ако ти кажам дека постојано сум на јавни настани и сум мотиватор и зборувам за нашата борба.
Го живееш сонот, работиш како водител и луѓето те обожаваат.
Никогаш не сум била посреќна – вели Николова и додава дека иако луѓето знаат честопати да гледаат во неа, тоа не го прават со лоши намери, туку со восхит.
Луѓето се љубопитни, ама ќе се навикнеш на погледите. Не се со сожалување, туку со восхит – вели таа.
На Instagram Story, Цеце објави дека сака да ја подари периката на некоја обожавателка која се чувствува како што се чувствувала таа на 18 години и има потреба од неа.
Израсната без родители, во СОС детското село, инспиративната водителка која се соочува со алопеција, денес е симбол на истрајност, глас против предрасудите и поддржувач на младите кои го делат истото детство како неа.
Може сѐ 💕- стои во описот на видеото.
