„Нема контрола над мускулите“: Сестрата на Селин Дион за синдромот на вкочанета личност на пејачката

Состојбата на Селин Дион се влошува и покрај напорите на најблиските и на докторите да ѝ помогнат.

74-годишната пејачка, која страда од синдром на вкочанета личност, ја изгубила контролата над мускулите. Нејзината сестра Клодет Дион сподели лоши вести со фановите на славната музичарка.

„Многу се труди, но нема контрола над нејзините мускули. Она што ми го крши срцето е што таа отсекогаш беше дисциплинирана. Секогаш работеше напорно. Вистина е дека во нашите соништа, и во моите и во нејзините, целта е таа да се врати на сцената. Со каков капацитет? Не знам“ – рекла таа.

Во декември 2022 година, Селин сподели дека ги откажува сите преостанати концерти од нејзината турнеја „Courage“ поради тоа што страда од неизлечива невролошка болест која ги напаѓа мускулите.

„Гласните жици се мускули и срцето е исто така мускул. Бидејќи ова е еден случај на милион, научниците немаат направено многу истражувања, бидејќи не засега многу луѓе“ – рекла Клодет за 7 Jours.

„Некои луѓе изгубија надеж, бидејќи тоа е болест која не е добро позната. Кога само би знаеле колку луѓе се јавуваа во нашата фондација за да ни кажат колку ја сакаат Селин и дека се молат за неа. Добива многу пораки и подароци“ – додала таа.

Синдромот на вкочанета личност е ретка невролошка болест со карактеристики на автоимуно заболување. Симптомите вклучуваат мускулни грчеви, неможност за наведнување, болка и хронична анксиозност. Мускулните грчеви можат да бидат толку силни што да доведат до изместување на зглобови и дури и кршење на коските. Пациентите може да завршат во количка или да бидат неподвижни, често не можат да работат и да се грижат за себе.

Нема лек за овој синдром, но постојат третмани кои помагаат за ублажување на симптомите.

Селин последен пат беше видена во јавност во ноември.

Селин има три деца со Рене Анжелил, кој почина од рак во 2016 година.