„Нека патува меѓу ѕвездите“: Пере од Нокаут со емотивна објава се збогува со бизнисменот Огњан Циговски
Никола Перевски-Пере со емотивна објава на социјалните мрежи се збогува од бизнисменот Огњан Циговски, кој почина по долгогодишна борба со болест.
Пејачот од групата Нокаут сподели фотографии со Циговски и се присети на нивните бројни соработки и на дружбите.
„Огњан ќе го паметам само по добро… по многуте соработки, а уште повеќе по дружбите што ги имавме. Имаше ведар дух и ретка смисла за хумор. Никогаш нема да го заборавам новогодишниот дочек во хотел ‘Бистра’ во Маврово. Огњан, облечен како Дедо Мраз, нè смееше сите од најмалиот до најстариот“ - напиша Пере.
Тој истакна дека иако многумина го знаеле Циговски по неговиот успех, оние кои биле блиски со него знаеле каков човек бил.
„За неговиот успех знаеја многумина. Ние што го познававме знаевме колку добар човек, сопруг и татко беше. Таков и ќе го паметиме. Нека патува Огњан Циговски меѓу ѕвездите, кон бескрајот. 🤍“ – дополни тој.
Циговски беше долгогодишен раководител на Скијачкиот центар Маврово, поранешен сопственик и управител на „Ресорт Маврово“ и претседател на Скијачката федерација на Македонија.