„Налепница“: Маестралниот краток филм со Сашко Коцев кој е невозможно да ве остави рамнодушни

Георги М. Унковски одново разбуди силни емоции со објавата на краткиот филм „Налепница“. Македонскиот режисер го сподели филмското дело на YouTube, а многумина се длабоко погодени од тематиките кои ги обработува и го нарекуваат „ремек-дело“.

Главната улога ја има Сашко Коцев, кој дава сè од себе да стигне навреме и со подарок на приредбата на неговата ќеркичка додека наидува на апсурдни пречки.

„После неуспешен обид да ја обнови регистрацијата на својот автомобил, Дејан пропаѓа во апсурден бирократски лавиринт што ја тестира неговата решителност да остане добар татко и присутен во животот на својата ќерка 'Налепница' е краток филм за малиот човек, големата љубов кон семејството и суровата апсурдност на системот“ – пишува Унковски, кој е и сценарист и режисер на филмот.

„Налепница“ - видео

Филмот, кој беше снимен во 2019 година, има учествувано на над 200 фестивали и има освоено десетици награди. Покрај Коцев, во филмот глумат и Мони Дамевски, Џевдет Јашари, Љупчо Тодоровски, Соња Стамболџиоска, Димитрија Доксевски, Калина Димитровска, Анастасија Аневска, Матеј Настевски. Кинематографер е Наум Доксевски, а сценографијата е на Кирил Спасевски.

Унковски годинава го објави својот прв долгометражен филм. Станува збор за „Диџеј Ахмет“, кој премиерно беше прикажан на Филмскиот фестивал „Санденс“.