Модниот месец започна во динамичниот Њујорк. Рекордни 125.000 посетители итаа од ревија на ревија, од забава на забава, создавајќи мал стилски хаос.
Марк Џејкобс со екстравагантно шоу ги спушти завесите на повеќедневниот настан, за време на кој беа разоткриени колекциите пролет/лето 2016 на стотина дизајнери.
Лежерните колекции ѝ подарија на толпата едно големо „дежа ву“. Мешавината од хипи, гранџ и спортска инспирација врескаше „веќе видено“, но ентузијазмот на публиката ја задржа возбудата на високо ниво. „Новитет“ на пистите беше ангажирањето на сè повеќе манекенки од различни раси и големини.
Наим Кан
Во умствениот вртлог на Кан биле неговите музи Грејс Кели и Софија Лорен додека тој ја креирал новата колекција, но самиот концепт за неа се родил додека тој бил на патување во Мексико. Популарниот дизајнер открил дека се инспирирал од забавата за 60. роденден на неговата сопруга, кога гостите требало да се облечат во стилот на Фрида Кало.
Вкупно 600 лица работеле на колекцијата со детали и декорации кои заробуваат погледи.
Каролина Ерера
Деликатната розово-бела колекција на Каролина пленеше со дискретна транспарентност, нежност и неочекувани геометриски елементи.
„Тајната на тоа да си здодевен е да кажеш сè... Важно е да се зачува малку мистерија. Јас дизајнирам облека која е заводлива и сензуална, но секогаш ѝ оставам нешто за имагинацијата. Модата, на крајот на краиштата, е за фантазија“ – рекла Ерера.
Ралф Лорен
Новата колекција на Лорен е модерна експресија на гламурозниот дух на француската ривиера.
Елегантни морнарски комбинации, смели колоритни принтови кои се асоцираат со модернистичката уметност, лелеави фустани со риги и ситни цвеќиња... 75-годишниот моден ветеран не експериментира премногу, но токму тоа ја одржува неговата популарност кај дамите.
Дајен фон Фирстенберг
„Оваа колекција ја слави жената, убавината, слободата и природата. Таа е за жените кои се чувствуваат како божици“ – изјавила Фирстенберг и објаснила дека се инспирирала од првата уметничка слика која ја купила.
Оптимистичката колекција вклучува судир на принтови, леснотија и класични силуети.
Викторија Бекам
„Безгрижна“ – со овој збор Викторија неколкупати ја опиша својата колекција и сподели дека при креирањето потсвесно ѝ влијаеле различните места низ светот кои таа редовно ги посетува.
Ведрите бои се резултат на нејзините патувања во Африка, карето е во чест на Лондон каде таа живее сега со своето семејство, а „сурферските“ мотиви доаѓаат од Калифорнија каде славното семејство создаде дом во изминатите години.
Живанши
Ревијата на Рикардо Тиши крена голема прашина и пред да започне, бидејќи сите сакаа да ѕирнат што ќе понуди талентираниот дизајнер за 10-годишнината од влегувањето во модната куќа, но и по завршувањето, заради модниот перформанс во чест на загинатите во терористичкиот напад на 11 септември и заради новите црни и бели креации.
Интригантниот танц на Тиши помеѓу машкоста и женственоста резултираше со колекција која ги исправи гостите на нозе. „Таа ми дојде многу природно, полна е со љубов. Тоа е многу романтична колекција, јас сега сум во многу романтичен момент од мојот живот“ – рекол Тиши.
Ана Суи
Разиграната колекција на Суи влече корени од Тахити и Хонолулу. Релаксирани силуети, силни бои и смели принтови ги разбудија фантазиите на гостите за уживање на рајски островски плажи.
Мајкл Корс
Лежерна елеганција и земјени нијанси царуваат во колекцијата на Корс, кој се инспирирал од дами како Елза Перети и Џорџија О’Киф.
Транспарентните ткаенини и расечените здолништа внесоа умерен сексапил. „Убеден сум дека можеш да бидеш покриена, а сепак да бидеш секси“ – коментирал Корс.
Марк Џејкобс
Театралноста на Џејкобс не познава граници, па неговите забавни изненадувања секогаш го засилуваат љубопитството на публиката. Црвената, сината и белата боја застанаа во темелите на гранџ колекцијата, потсетувајќи на знамето на САД. „Што е Америка за мене? За мене, Америка е Њујорк“ – рекол Марк пред шоуто.
Армија ѕвезди, меѓу кои и Адријана Лима, Ирина Шајк, Џоан Смолс и Емили Ратајковски, парадираа со фризури инспирирани од 40-тите години и облека која го елиминира чувството на рамнодушност. И пејачката Бет Дито беше една од избраничките на Џејкобс, кој спектакуларно го означи крајот на модната недела во Големото јаболко.
