Хју Џекман порасна без мајчинска топлина, бидејќи неговата мајка го напуштила уште кога имал само осум години. Но, славниот актер пронајде сила да ѝ прости на жената која го родила.
52-годишниот холивудски шармер сподели фотографија на која ја прегрнува својата мајка Грејс. На неа, и двајцата се гледаат еден со друг со искрени насмевки на лицата.
Во изминатите години, Џекман неколкупати има зборувано за семејната состојба и напуштањето од страна на мајка си го нарекуваше трауматично. „Беше трауматично, се надевав дека ќе се врати еден ден“ – изјавил Хју, кој бил одгледан од неговиот татко.
Родителите на Хју биле мигранти во Австралија, но поради непознати причини, неговата мајка одлучила да ги напушти и се вратила повторно во Англија.
Во интервју во 2012 година, Хју проговори за утрото кога заминала неговата мајка. „Се сеќавам дека нејзината коса беше завиткана со крпа и одеше низ куќата и се збогуваше. Тоа веројатно беше нејзиниот начин да каже збогум. Потоа јас отидов во школо и кога се вратив, немаше веќе никој дома. Следниот ден пристигна телеграма од Англија. Мајка ми беше таму. И тоа беше тоа. Татко ми се молеше секоја вечер за мајка ми да се врати“ – раскажал Џекман.
Хју вели дека има разбирање на состојбата во која била мајка му и за нејзината одлука да замине. „Знам дека можеби звучи чудно, но никогаш не почувствував дека мајка ми не ме сака. Оттогаш имам разговарано многу со неа и знам дека не ѝ беше лесно. Таа беше во болница по моето раѓање од постнатална депресија. Не наоѓаше поддршка тука“ - сподели тој.
„Многу деца растат во тешки семејни услови и јас не се сожалувам себеси што и мојот случај беше таков“ – вели тој. „Татко ми е мојата карпа. Од него научив сè за лојалноста, сигурноста, да се биде таму за најблиските без разлика на сè. Семејството е секогаш важно“ – додава Џекман.
Џекман има две сестри и двајца браќа. По преселувањето на нивната мајка, девојките заминале да живеат со неа, а момците останале со татко им.
