Студениот бран постепено пристигнува, носејќи ни дождливи и снежни денови, а воедно и актуализирајќи нови трендови. Најсилната модна порака која дизајнерите ни ја испраќаат за сезоната есен/зима е да избереме впечатливи обувки кои имаат моќ да го трансформираат изгледот.
Ултра високите потпетици прават простор за умерено високите штикли, висината на чизмите варира, боите стануваат побогати и помрачни, а деталите повпечатливи. Па, кои се моделите и стиловите на обувки со кои ќе чекорите со стил во ладните месеци?
Чизмички до глужд
Чизмичките со висина до глуждовите се попопуларни од кога било досега. Моделите со шпиц прават голем кам-бек, но не е задолжително да ги преферирате. Единствен критериум при изборот на чизми до глужд треба да ви биде нивната уникатност, изразена преку забележителни детали.
Чизми во јавачки стил
Топли, комфорни и модерни – чизмите во јавачки стил ќе ви овозможат да летате низ влажните улици, без да се загрижувате дали сте си ги испрскале фармерките. Можете да ги комбинирате со супер тесни фармерки и сако или пелерина, но и со кратки фустани.
„Мери Џејн“ со полна потпетица или дебела штикла
Чевлите тип „Мери Џејн“ константно добиваат нови и нови модификации. Моментално најпосакуваните „Мери Џејн“ имаат или полна потпетица или дебела штикла. Гледајте на нив како на одлична есенска замена за сандалите на платформа.
Нитни, боцки, метални детали
Станете подрски во покажувањето на бунтовничкиот дух со обувки декорирани со нитни, боцки или други интересни метални детали. Тие се јасен сигнал дека не се плашите од ризично инкорпорирање на погруби елементи во женствениот изглед.
Високи до колената
Не ги занемарувајте чизмите високи над колената, но ако купувате нови, ставете приоритет на моделите со висина до колената. Рамни или на штикла – изборот е ваш.
Kапаче на прстите
Уште минатата сезона обувките со „капаче“ на прстите направија бум, па дизајнерите решија да не ги отфрлат толку брзо од своите колекции. Не е важно дали станува збор за балетанки или елегантни чевли на штикла, капачето е детаљ со кој вреди да експериментирате.
Балеринки со нежен шпиц/Слипери
Не мора да сте подигнати неколку сантиметри од земјата за да изгледате шик. Одморете ги стапалата со балетанки или слипери. Иако речиси секој модел ќе ви подари модерен изглед, најактуелни се поукрасените балетанки и слипери кои внесуваат динамика во целосниот изглед.
Полна потпетица + врвки
Ништо не ви гарантира сигурен чекор и издолжени нозе како чизмите на полна висока потпетица тип полумесечина. А, кога тој модел е во комбинација со врвки, знајте дека сте наишле на вистинските чизми за претстојните студени денови.
Моторџиски чизми
Некои ќе речат дека моторџиските чизми изгледаат грубо и дека во нив нема ниту грам женственост. Но, искусните стилисти и модни блогерки знаат дека токму тој силен изглед на моторките е како пикантен зачин при креирањето на комбинации полни со стил.
Патики со полна висока потпетица
За спортски, но шик изглед, дизајнерите имаат новитет кој започна да мами обожаватели уште минатата сезона – патики со висока полна потпетица тип полумесечина. Откако трендот проби во Холивуд, брзо се распространи и високите патики станаа едно од најинтересните модни парчиња за денешниот уличен стил.
Класика: шпиц + тенка штикла
Не бегајте од шпицот, тој е буквално насекаде, а како што стојат работите, ќе остане доминантен и наредната година. Класичната силуета изградена од тенка штикла и елегантен шпиц ги освои дамите од Холивуд, па вреди и вие да ѝ дадете шанса.
Што уште треба да знаете? Деталите од змиска кожа и ниските обувки во машки стил не ја изгубија популарноста. Нема да погрешите и доколку окото ви запре на чизми во вестерн стил.