Модниот свет денес се збогува со Кејт Спејд. Познатата дизајнерка си го одзеде животот на 55-годишна возраст.
Според информации до кои дојдоа странските медиуми, Спејд се обеси во својот апартман во Њујорк. Таа беше пронајдена мртва од нејзината помошничка околу 10 часот утринава заедно со проштална порака.
Спејд ги освои срцата на модерните дами со своите елегантни чанти кои беа хит во 90-тите години, a до ден-денес се дел од стајлинзите на холивудските ѕвезди.
Кејт и нејзиниот сопруг Енди го основаа брендот Kate Spade New York во 1993 година. Нивниот фокус најпрво беше ставен на чанти, а подоцна започнаа да креираат и облека и други модни додатоци.
За својот придонес во модната индустрија, Спејд два пати беше наградена од Советот на модни дизајнери на Америка (CFDA).
Парот ја продаде милионската компанија во 2006 година и се дистанцира од модната индустрија. „Ми требаше пауза и навистина сакав да ја израснам ќерка ми. Го сакав тоа што го правев, но не ми недостигаше толку многу колку што очекував“ - изјави тогаш Кејт.
Пред две години, Кејт повторно се обиде да се врати во модниот свет, создавајќи го брендот Frances Valentine, кој го доби името по нејзината 13-годишна ќерка Франсис.
