Интернационалниот фестивал на филмската камера „Браќа Манаки“, посветен на креативноста на светските кинематографери, има специфичен шарм и посебна филмска атмосфера.
Миланка Рашиќ, водителка и ТВ автор, со години е дел од магијата во Битола, а за нејзиното присуство и модниот избор вели:
Драго ми е што сум петта година на фестивалската сцена претставувајќи ги филмовите и присутните гости. Сметам дека треба да сум дел од таа препознатлива атмосфера и со изгледот на сцена. Да не се претерува, но да е впечатливо.
Избравме интересни, тренди и елегантни комбинации во бордо и темно сино, чоколадно кафени нијанси, како и црна и бела боја.
На свеченото отворање, кое секако бара повеќе гламур, носев елегантен розов светкав фустан, а за затворањето црн сатенски комплет со пантолони.
Вистинско задоволство е да се соработува со Весна Станковска и Офелија Станковска од „Ермитаж“, дами кои ги познаваат светските модни трендови и добро знаат што ми прилега. Посебно ги почитувам поради тоа што со години ги поддржуваат и промовираат културните настани и фестивали во Македонија.
Весна Станковска, која стои зад „Ермитаж“, за соработката споделува:
Соработката со Миланка ја започнавме во 2022 г Претходно ја гледав како гостинка во една ТВ емисија каде со многу почит и воодушевување зборуваше за фестивалот „Браќа Манаки“. Дознав за нејзината работа на поранешните фестивалски изданија, специјалните емисии на Македонската Телевизија, интервјуа со лауреатите, водење на свеченото отворање и доделувања награди. Нејзината професионалност и непосредност ми оставија многу убав впечаток.
Се запознавме, започнавме успешно да соработуваме и таа носеше модни комбинации од „Ермитаж“ на премиери, фестивали и во нејзината емисија за филм „Во кадар“.
Сметам дека со целото искуство, начинот на презентирање и со модниот избор, ѝ додава капка убавина на сцената на „Браќа Манаки“.
