Македонската манекенка Маја Глигоровска ѕвезда во две креации на ревија во Кан: „Беше огромна чест“
Маја Глигоровска ја имаше честа да ја отвори и затвори ревијата на дизајнерката Викторија Џимревска која се одржа во култниот хотел „Carlton“ во Кан, за време на престижниот филмски фестивал.
Носејќи две впечатливи креации, атрактивната Македонка беше главна ѕвезда на пистата, а за Фемина ги сподели импресиите.
„Ревијата се одржа во Кан, во прекрасна атмосфера за време на Канскиот филмски фестивал во хотелот Carlton.
Ја отворив ревијата и тоа беше огромна чест за мене. Со дизајнерката Викторија Џимревска, која е присутна на сите светски модни сцени и секогаш ги бара најдобрите модели, а јас ја имав таа чест и довербата ми ја даде мене да ја отворам и затворам модната ревија“ - ни изјави Маја.
„Чувството на писта беше неверојатно, многу емоции, адреналин и прекрасна енергија од публиката. Реакциите во Кан беа прекрасни и навистина го почувствував целиот гламур и магија на моментот. Енергијата, светлата, атмосферата во Кан… сè беше на едно светско ниво. Најубаво чувство е кога ќе излезеш на писта и ќе ја почувствуваш реакцијата од публиката уште со првиот чекор. Горда сум што бев дел од таков момент и што имав чест да ја отворам ревијата“ - дополни Маја.
