Македонската актерка Тамара Ристоска шармантна „Аргентинка“ на снимањето на сцена од српски филм во Буенос Аирес
Тамара Ристоска е дел од екипата на српскиот филм „Ruka pravde“.
Македонската актерка ја има улогата на Аргентинката Глади, која е вереница на главниот лик Благоја Јововиќ. За снимањето, таа морала да научи да зборува шпански јазик и не крие дека е пресреќна што е дел од овој филмски проект.
На социјалните мрежи, објавени се фотографии од сцена со Тамара снимена во Буенос Аирес, според кои слободно може да се каже дека е совршена за улогата.
„Оваа сцена е снимена во Буенос Аирес, на плоштад, со море од статисти и стари автомобили кои се гасеа по малку. Организациски, една од најтешките сцени за снимање во целиот филм. Штом го снимивме последниот кадар, почна да врне дожд. Тоа е еден од оние напорни, но посебни денови кои човек ги памети. Многу луѓе многу напорно работеа за оваа сцена со возење да се архивира на вистински начин“ – стои во описот на фотографиите.
Филмот „Ruka pravde“ го следи Благоја Јововиќ, кој живее мирен живот во Буенос Аирес во 1950-тите години, градејќи успешен бизнис и подготвувајќи се за брак. Но, случајна средба со човек кој носи усташки симбол ги отвора старите рани од минатото и го води до шокантно откритие – озлогласениот усташки водач Анте Павелиќ се крие во Аргентина под државна заштита.
Решен да ја истера правдата, Јововиќ тргнува во опасна и неизвесна мисија. Со помош на близок пријател и агент на Мосад, тој внимателно го следи Павелиќ и го планира нападот што ќе стане еден од најзначајните моменти во потрагата по одговорност за злосторствата од Втората светска војна.
Инспириран од вистински настани, филмот ја раскажува приказната за човек кој, воден од личната болка и чувството за правда, се осмелува да му се спротивстави на еден од најбараните воени злосторници, во обид кој засекогаш ќе остави трага во историјата.
