Македонката Катерина Шиповиќ победи на Белградскиот ултрамаратон, истрча над 211 км за 24 часа

Волја, мотивација, истрајност, издржливост и напорни тренинзи... Да се трча ултрамаратон цели 24 часа воопшто не е лесно, но да се победи на истиот е неверојатно достигнување.

Македонската ултрамаратонка Катерина Шиповиќ го освои првото место на 24-часовната трка Шри Чинмој во Белград, каде постави нов национален рекорд во трчање на 24 часа. Таа помина повеќе од 211 километри, надминувајќи го рекордот поставен во 2019 година, кој исто така го носеше нејзиното име.

За својот успех, Шиповиќ објави пост на социјалните мрежи каде сподели и фотографии:

„Шри Чинмој ултрамаратон, Белград. Трка на 24 часа / истрчани 211,059 км. Прво место генерален пласман, рекорд на стаза и нов национален рекорд. Трката која со душа ја чекав. Успеав да го реализирам резултатот за кој се подготвував“ – напиша Катерина и им се заблагодари на сите кои беа дел од нејзината екипа и 30 часа беа активни и ѝ помагаа во овој подвиг.

Минатата година, Шиповиќ стана првата ултрамаратонка од нашата држава која учествувала на Спартатлонот во Грција. Трката долга 246 километри од Атина до Спарта во Грција е една од најтешките ултрамаратонски трки во светот, а таа ја истрча за 34 часа, 36 минути и 12 секунди, освојувајќи го 102-рото место од 380 учесници.