Мајка на дете со Даунов синдром им возврати на сите кои ѝ велеа „Жал ми е“: „Нема за што да жалите, погледнете го“
Кога на Пејџ Викторија Краудер ѝ било соопштено дека нејзиното бебе има Даунов синдром, реакциите од околината биле речиси исти, полни со сожалување и со зборовите „Жал ми е што син ти има Даунов синдром“.
Но, наместо тага, младата мајка пронашла љубов, радост и нова перспектива на гледање на светот.
„Го кажуваа тоа како да треба да жалам за нешто, како да изгубив нешто уште пред да го запознаам. А никој не ме подготви за тоа колку ќе биде сладок. Колку ќе биде среќен. Колку лесно ќе биде да го сакам“ – пишува Пејџ на социјалните мрежи.
Нејзините видеа на социјалните мрежи имаат за цел да ја подигнат свеста за ова нарушување и Краудер вели дека ќе продолжи да ги снима сè додека луѓето не престанат да велат: „Жал ми е“.
„Ќе продолжам да зборувам сè додека ‘жал ми е’ не престане да биде првото нешто коешто го кажуваат луѓето“ – порачува мајката.
„Можеби вие гледате Даунов синдром. Јас го гледам мојот син. И не би променила ништо кај него“ – категорична е Пејџ.
За неа, Леви не е дефиниран од дијагнозата, бидејќи истата е само мал дел од него. Сè останато е чиста радост, од заразната насмевка со детската љубопитност и љубовта која не познава услови.
„Дауновиот синдром не му одзеде ништо на моето бебе… му даде на светот повеќе од она што му треба“ – пишува Краудер.
Во своите објави, Пејџ искрено признава дека најголемата промена не била во нејзиното дете, туку во нејзината перспектива. Наместо стравови и најлоши сценарија, денес гледа мали, совршени моменти.
„Сакав да го замислам ова кога првпат ја слушнав дијагнозата, не страв, туку смеа. Не тага, туку живот исполнет со радост“ – стои во една од нејзините објави.
