Луксуз и стил во Марбеља: Српската блогерка Тамара Калиниќ ужива на моминско патување со пријателките
Тамара Калиниќ деновиве ужива на моминско патување во друштво на нејзините најблиски пријателки. Српската модна инфлуенсерка и претприемачка, која е во екот на подготовките за свадбата со вереникот Филипо Теста, ги поминува своите последни мигови пред големиот ден во луксузниот ресорт Пуенте Романо во Марбеља, Шпанија.
Судејќи по објавите на социјалните мрежи, претсвадбеното патување вклучува традиционални невестински ритуали, уживање покрај базен, на јахта, на тениски меч, свечени вечери и забави за кои сите изгледаат како излезени од модно списание.
Идната невеста може да се види во неколку беспрекорни модни изданија, во кои секако доминира белата боја. Кратките бели фустанчиња со особено впечатливи детали се нејзиниот омилен моден избор за специјалните денови.
„Има нешто навистина посебно во тоа да поминуваш време со своите девојки пред свадбата. Како да ни е вродено да ја славиме женската енергија, благословите и мудроста пред да започне едно ново животно поглавје.
Од утрата во „Пуенте Романо Ресорт“, до разговорите, ритуалите, традициите, коктелите, шопингот, па дури и презентацијата посветена на нашето пријателство – моите девојки вложија толку многу креативност и љубов за овој период да го направат незаборавен за мене.
Никогаш нема да го заборавам ова. 💕 #testalavista #bachelorette“ - напиша Тамара на една од објавите.
Тамара Калиниќ го прифати предлогот за брак на италијанскиот менаџер на луксузни брендови Филипо уште на почетокот на летото 2023 година, во романтична атмосфера на брегот на Амалфи, во гратчето Равело, кое парот често го нарекува своја омилена дестинација.
Двојката е заедно од 2020 година и претставува пример за тоа како успешно може да се балансираат професионалните ангажмани во светот на модата и приватниот живот. Иако е познато дека свадбата ќе се одржи во 2026 година (и се очекува вистински спектакл), точниот датум, локацијата и останатите детали сè уште се чуваат во тајност.
