Лејди Гага им однесе пица и кафе на лица евакуирани поради пожарите за Денот на љубезноста
Вчера светот го прослави Светскиот ден на љубезноста. По тој повод, Лејди Гага одлучи да ги изненади евакуираните лица поради пожарите во едно од засолништата во Калифорнија.
32-годишната пејачка однесе во центарот на Црвениот крст топли пици, кафе и картички со пораки.
„Денес е мојот омилен ден од годината – Светскиот ден на љубезноста. Ве охрабрувам сите да направите едно добро дело, дури и ако е наменето за вас“ – вели таа во едно од видеата објавени на Instagram.
„Ова е едно од моите добри дела за денес. Ве охрабрувам да го направите истото. Бидете љубезни“ – додава Гага во друго видео.
Познатата музичарка беше дел од лицата кои беа евакуирани од своите домови поради огнената стихија која ја зафати Калифорнија, а во која изгореа домови на неколку славни личности. За среќа, нејзиниот дом не беше зафатен од пламените јазици.
„Ви ја предавам мојата љубов... Знам дека не се познаваме едни со други, но ве сакам. Ова е итен случај, но вие не сте сами“ – им рекла таа на евакуираните лица.
Бројот на лица кои ги загубиле животите во пожарите се искачи на 50.