Снимањето на „House of Gucci“, базиран на вистинска приказна со Лејди Гага и Адам Драјвер во главните улоги, се одвива под будното око на медиумите.
Новите сцени привлекоа голем интерес, бидејќи ги прикажуваат актерите во свадбено издание во Рим.
Лејди Гага е елегантна невеста во улогата на Патриција Реџани додека Адам го портретира Маурицио Гучи.
Вистинските Патриција и Маурицио стапија во брак во 1973 година.
Биографскиот филм режиран од Ридли Скот ја раскажува сторијата за убиството на Гучи од платен убиец ангажиран од самата Патриција.
Накратко за сторијата која го инспирира филмот:
По 12 години брачен живот, Маурицио Гучи, наследникот на модната империја Гучи, ја напушти својата сопруга Патриција за помлада љубовница. Тој ѝ кажа дека заминува на бизнис патување и никогаш не се врати дома во 1985 година. Во 1991 година, тие и официјално се разведоа.
Пет години Маурицио беше на чело на Гучи, но во 1993 година беше принуден да ги продаде сите акции за 170 милиони долари. Околу година и пол подоцна, тој беше убиен на скалите пред канцеларијата во која работеше.
Патриција беше осудена на 29 години затвор за организирање на неговото убиство преку платен убиец. Таа е нарекувана „црната вдовица“. По 18 години поминати зад решетки, Патриција беше ослободена во октомври 2016 година.
Во филмот ќе ги видиме и Џаред Лето, кој на сетот изгледа тотално непрепознатливо, како и Ал Пачино и Салма Хајек.
