Крвава битка за милијарди: Наследникот на Mango обвинет за убиство на татко си, го турнал од карпа

Повеќе од една година по трагичната смрт на основачот на брендот Mango, Исак Андик, шпанските власти открија шокантни детали кои ја потресоа јавноста. Неговиот син, Џонатан Андик, е уапсен под сомнение дека го убил татко си, со што целосно паднаа во вода првичните тврдења дека модниот магнат го загубил животот случајно, лизнувајќи се од карпа.

Исак почина за време на планинарење со Џонатан на планината Монсерат во Каталонија. Според првичната верзија на настаните раскажана од самиот Џонатан, неговиот татко се лизнал на една од патеките и паднал од карпа висока 150 метри, во близина на пештерите Салнитре во Колбато, Барселона.

На почетокот се веруваше дека станува збор за несреќен случај. Сепак, недоследностите во исказите на Џонатан и новите докази ја насочиле истрагата во сосема друг правец.

Неколку шпански медиуми пренесуваат дека односите меѓу таткото и синот биле исклучително тензични и дека непосредно пред кобниот инцидент тие имале сериозна и жестока расправија. Џонатан, кој досега ја извршуваше функцијата потпретседател на управниот одбор на модната компанија, се очекува наскоро да биде изведен пред судија.

Исак беше еден од најбогатите луѓе на светот со богатство кое се проценуваше на 4,5 милијарди долари. Роден е во Истанбул, Турција, во 1953 година, а во 1969 година со семејството се преселил во Барселона, каде со неговиот брат започнале да продаваат облека. Подоцна, тие отвориле продавници и во Мадрид. Името Mango го избрал Андик откако го пробал овошјето манго за време на патување на Филипини.