Кога штркот навистина дојде во Newborn Clinic: Марија Дуда и Јорго во необична посета на клиниката

Понекогаш најубавите приказни се случуваат сосема непланирано.

Марија Дуда, жената зад The Countryside, која со години несебично се грижи за спасени животни, неодамна пристигна во Newborn Clinic со еден навистина необичен гостин – штркот Јорго.

Марија е позната по својата голема љубов кон животните и хуманитарната работа. На нејзиниот ранч The Countryside дом и грижа наоѓаат бројни животни, меѓу кои и повредени штркови кои поради својата состојба не можат да заминат со останатите. За нив грижата не завршува со летото – потребни се храна, нега и услови во текот на целата година.

Токму оттука започна и оваа мала приказна.

Откако во Newborn Clinic дознаа дека на Марија ѝ е потребна поддршка за храната и грижата за штрковите кои остануваат кај неа, клиниката одлучи да помогне.

Неколку дена подоцна, Марија возврати на свој начин – го донесе Јорго на гости во Newborn.

Штркот прошета низ клиниката, го запозна медицинскиот тим и за кратко време стана центар на внимание. А особено симболичен беше моментот кога Јорго се најде покрај една идна мајка во клиниката – фотографија која речиси и не бара објаснување.

Во клиника во која штркот симболично секојдневно се очекува со најубавите вести, овојпат тој навистина пристигна.

Но зад симпатичната средба останува многу поголема приказна – онаа за една жена која голем дел од своето време, енергија и средства ги посветува на животни на кои им е потребна помош.

Гледајќи ги Марија и Јорго заедно, д-р Татјана Гуржанова од Newborn Clinic ја сумираше средбата во една реченица:

„За Силјан се сними документарец. За Марија треба да се сними документарец.“

Можеби токму затоа посетата на Јорго беше многу повеќе од интересен ден во клиниката. Беше потсетник дека грижата и човечноста немаат граници – и дека секој од нас може да направи разлика.