Јован Јованов и Тони Зен го објавија спотот за „Уште ми требаш“, продолжението на култната „Итно ми требаш“
„Уште ми требаш“ доби видеоспот. По премиерната изведба на „Макфест“, Јован Јованов и Тони Зен го објавија видеото за песната, во режија на Гордан Божиновски.
Со „Уште ми требаш“, двајцата музичари се навраќаат на приказната која пред 18 години ја започнаа со Ламбе Алабаковски во „Итно ми требаш“. Тогаш сè почнуваше со поглед и насмевка во клуб, а сега пеат за чувствата кои останале долго по таа ноќ.
„Некои песни не можат да се повторат, но некои приказни заслужуваат да продолжат“ - изјави Јованов пред макфестовската премиера. Новата песна ја опиша како поемотивна, посветена на „спомен кој не е избледен“.
Музиката за „Уште ми требаш“ ја напиша Јован Јованов, кој е автор и на текстот заедно со Тони Зен. Продукцијата ја потпишуваат Јован и Иван Јованов.