Речиси две децении по првите скици и првите чекори во модниот свет, името на македонскиот дизајнер Дејан Сидор денес јасно одекнува на домашната модна сцена. Неговиот потпис не е само во кројот, но во урбаната порака која е длабоко вкоренета во македонскиот идентитет. Всушност „SIDOR“ е моден бренд за оние кои знаат зошто го носат токму тоа парче.
Кога се навраќа на почетоците, Дејан раскажува гордо, со јасна свест за изминатиот пат.
„Како млад дизајнер го имаш сонот за реализација, сега тоа го реализирам“ – вели тој за Фемина, сумирајќи години работа во една реченица што носи и трпение и упорност.
Иако пошироката публика го препознава поинтензивно во последните години, неговиот стил отсекогаш бил препознатлив.
„Секогаш сум бил препознатлив по начинот на кој се изразувам – како студент, кога сум работел во позадина. Но, почнав да се 'ѕиркам' како SIDOR со Next Time, Снеже Велков, Антониа Гиговска“ – раскажува тој, посочувајќи дека видливоста доаѓа кога ќе се совпаднат вистинскиот момент и автентичноста.
Фактот што неговите модели ги носат јавни личности со силен идентитет не го гледа како случајност.
„Секогаш е важно кој, како, каде и зошто“ – нагласува Сидор, потенцирајќи дека облеката живее вистински дури кога ќе ја носи личност која ја разбира пораката.
Неговите колекции често се опишуваат како концептуални и со јасна идејна нишка. За него, таа нишка е лична.
„Тоа сум јас, всушност, како гледам на работите поврзани со мене. Биди урбан со нашето минато и историја. Секој дизајн го наметнува своето“ – вели дизајнерот, ставајќи до знаење дека модата е форма на личен став.
Кога станува збор за препознатливост, Сидор не се двоуми, за него најважна е пораката:
„Излези од комерцијалата, следи тренд со своја естетика.“
Македонскиот национален идентитет е силно присутен во неговата работа, од мотиви инспирирани од македонските народни носии до современи интерпретации на традицијата, како националниот дрес.
„Националниот идентитет е секогаш важен во која било сфера – така те идентификуваат. Важно ми е да црпам инспирација од македонскиот народен костим и да го прикажам во друго светло“ – истакнува тој.
За разлика од многумина, Сидор не верува во компромис меѓу локалното и глобалното.
„Нема потреба да барам баланс. Ако бараш баланс, тогаш влегуваш во друга гранка на професијата. Јас се следам сам себе“ – вели, зборувајќи за својата посветеност на естетиката и малите, но значајни детали од македонската традиција.
Трендовите, пак, за него се повеќе предизвик отколку правило.
„Секогаш се трудам да наметнам, да покажам авторски печат – сепак тоа е мојата работа“ – додава.
И во приватниот живот не си поставува модни ограничувања:
„Секогаш си дозволувам слобода“.
Говорејќи за македонската модна публика, Сидор реално ја согледува состојбата:
„Модата е луксуз, но има и друг момент во нашето општество – многу мал број луѓе гледаат или препознаваат модно парче како важен дел од секојдневието или од пригодата, каде и како треба да се појават.“
Предизвиците, пак, ги гледа како неизбежен и неопходен дел од патот:
„Секогаш мора да има предизвици. Инаку не би постоеле.“
А за иднината? Наместо прогнози, нуди став:
„Секој дизајн треба да има нешто свое, да биде препознатлив. Не треба да следат трендови – желбата е дизајнерот да се наметне и да поставува тренд.“
Даница Караташова Илиоска / Femina.mk