Есена О`Нил е тинејџерка од Австралија со 600 илјади обожаватели на Instagram и 200 илјади следбеници на YouTube. Младата Австралијка крена огромна врева откако се откажа од социјалните мрежи со пораката „Ништо од ова не е реално“ и порача дека „нема ништо совршено во тоа секој ден да се обидуваш да направиш животот да ти изгледа совршен онлајн“.
Популарната тинејџерка со години градела свој имиџ на социјалните мрежи и заработувала и по 2.000 долари за една објава, рекламирајќи различни производи. Есена избриша 2.000 свои фотографии на Instagram, а на останатите 96 им ги промени описите за да ја покаже мрачната вистина која се крие зад нив.
Судејќи според објавените фотографии, изгледало како Есена да има живот од соништата, но таа призна дека воопшто не била среќна и дека се чувствувала мизерно и осамено. „Станав зависна од она што го мислеа другите за мене... Бев тежок зависник и верував дека бројот на лајкови и следбеници покажува на колку луѓе им се допаѓам. Пред да се свестам, социјалните мрежи станаа мој единствен идентитет. Не знаев што сум без нив“ – пишува таа.
Во редактираните описи на фотографиите Есена отворено зборува за своите чувства и ја пласира вистината за секоја „совршена“ објава.
„Ве молам лајкнете ја оваа фотографија. Се нашминкав, си ја навиткав косата, облеков тесен фустан и голем неудобен накит... Направив над 50 фотографии додека не ја добијам онаа што ја сакав, потоа долго време го обработував ова селфи со неколку апликации – само за да добијам социјално одобрување од вас. Нема ништо реално во ова.“
На друга фотографија 19-годишната девојка е во секси бел фустан. „Не платив за фустанот, направивме безброј фотографии обидувајќи се да изгледам жешко за Instagram, формалниот фустан направи да се чувствувам неверојатно осамено“.
„Тука имав акни, ова е премногу шминка. Се смеев бидејќи сметав дека изгледам добро. Среќата која се базира на надворешна убавина ќе го задуши твојот потенцијал тука на земјата“ – пишува таа за друга фотографија.
„Оваа фотографија беше единственото нешто кое направи да се чувтствувам добро тој ден. Колку депресивно. Ние како човечки суштества сме способни на многу повеќе од тоа да имаме тонирано тело.“
„Се фотографирав во 100 слични пози, трудејќи се стомакот да ми изгледа убаво. Едвај имав нешто јадено тој ден. Ѝ викав на мојата мала сестра да продолжи да ме слика додека не бев донекаде горда со фотографиите.“
„Нема ништо зен во тоа да се обидуваш да изгледаш зен, да се фотографираш додека се обидуваш да изгледаш зен и да го докажуваш твојот зен на Instagram.“
„Имав 16 години тука. 16!!! Не го носев овој аутфит надвор од дома, само за фотографијата. Што е опсесијата да се обидуваме да изгледаме повозрасно, посекси?“
„Спреј за тен, платен промотивен чај, минимална облека. Имав 15 години. Мислев дека ова е инспиративно.... Физичкиот изглед е многу лажлив. Фотографирање од одреден агол, филтери, тен... Плус бев многу млада и родена со природно долго торзо и тенка половина. Тоа е генетска лотарија. Нема ништо инспиративно во тоа.“
„Буквално се фотографирав пред бел ѕид само за да објавам на Instagram жешка фотографија. Кога гледате фотографии онлајн, барајте ја намерата зад нив. Социјалните медиуми и опсесијата со изгледот ја презедоа контролата над нашата младост. Никогаш не би ги носела овие штикли и овој фустан надвор од дома. Имав 15 години.“
„Не треба да ви биде цел во животот 15-годишна девојка која брои калории и претерано вежба. Секој што е зависен од славата на социјалните медиуми како што бев јас, не е при свест.“
„Единствената причина поради која отидов на плажа тоа утро беше да ги направам овие бикини фотографии, бидејќи една компанија ми плати, а исто така изгледав добро според сегашните стандарди на општеството.“
„Платена промоција за продукт за потемнување на кожата. Ја носев оваа облека за вежбање само за оваа фотографија.“
Во своето последно видео на YouTube, О`Нил признава дека се чувствувала мизерно кога се стремела кон повеќе прегледувања, лајкови и следбеници, а сега се чувствува многу подобро. „Не можам да опишам колку е убав животот без телефон, без социјални медиуми, без споредување или лајкови или следбеници. Ние не сме следбеници, ние сме суштества со индивидуалност и љубов. Никогаш не сум се чувствувала послободно“ – пишува таа.