Игор Џамбазов жртва на интернет криминал: „Профитираат од туѓата мака. Ви доаѓа крајот... Скапо ќе го платите ова“
Игор Џамбазов стана жртва на интернет криминал.
Македонскиот актер реагираше на социјалните мрежи откако се појави видео во кое тој е се злоупотребен за рекламирање на производ за слабеење. Во лажната реклама, Игор наводно ослабел „20 килограми за само 1 и пол месец“ со помош на природен производ.
За да ги заштити луѓето од измами, тој го објави видеото на своите профили на социјалните мрежи и напиша дека измамниците ќе платат за тоа.
Не, не сум ослабен 20 килограми.
Не, немам од тие таблети, чаеви, масти, што и да се. И не, не познавам никаква докторка Елизабета, а уште помалку со неа сум договарал било што околу користење на мојот лик, дело, а во овој случај и тело, за некаква реклама.
Ова видео, и уште многу други глупости на оваа тема веќе десет дена се појавуваат на Фејсбук. Ги пријавуваме, ги снемува, и после само неколку часа, повторно се појавуваат. Ова ви е класичен интернет криминал. И затоа адвокатите веќе работат, и наскоро ќе ги дознаеме овие бесчувствителни, криминогени суштества кои профитираат од туѓата мака.
Ви доаѓа крајот, да знаете...
И скапо ќе го платите ова.
