Хрватски навивачи „упаднаа“ на свадбена фотосесија во Филаделфија и ги „заразија“ младенците со еуфорија
Она што требаше да биде класична свадбена фотосесија во центарот на Филаделфија, се претвори во вистински спектакл, благодарение на хрватски навивачи на Светското првенство.
Додека младенците Ештон и Зак Смит позирале пред Градското собрание по венчавката, ги пречекала огромна група хрватски навивачи, препознатливи по црвено-белите коцкести дресови.
Нововенчаниот пар без двоумење им се придружил на навивачите, кои заедно скокале, пееле и навивале, а веселбата завршила со заеднички фотографии и многу насмевки.
Видеата од оваа необична средба брзо се проширија на социјалните мрежи и освоија симпатии ширум светот.
Но, приказната не заврши тука.
Токму инспирирана од овој несекојдневен момент, Хрватската туристичка заедница, во соработка со навивачкиот клуб Croatian Fans Embassy – We Croats (Mi Hrvati) и Игор Чавловиќ, одлучи да ги покани Ештон и Зак на брачно патување во Хрватска.
Младенците со големо воодушевување ја прифатиле поканата, а деталите за нивното патување и престој во хрватските туристички дестинации ќе бидат објавени наскоро.
„Ештон и Зак, добредојдовте во Хрватска, земјата со големо срце“ – порачаа од Хрватската туристичка заедница.