„Медена земја“ го освојува секој кој ќе го погледне, па така и Џејми Ли Кертис.
Холивудската актерка беше импресионирана од прекрасната приказна за Атиџе, а своето одушевување го изрази и преку порака на социјалните мрежи.
„Колку совршен филм за овој момент. ‘Медена земја’ е зачудувачки. Алчност. Ненаситност. Семејство. Љубов. Чест. Природа. Истрајност. Воодушевена сум“ – напиша Кертис.
„Медена земја“ раскажува приказна за Атиџе, последната жена-одгледувач на диви пчели во Европа, која живее сама со својата мајка во Централна Македонија. Главна идеја на филмот е да се прикаже припадноста на човекот кон природата и нарушувањето на природната рамнотежа преку судир на два различни начина на искористување на земјините ресурси.
Филмот е во режија на Љубо Стефанов и Тамара Котевска, а продуцент е Атанас Георгиев.
Документарниот филм, кој испиша историја со тоа што доби две номинации за Оскар, продолжува да се прикажува во кината низ државата.