Холивудска трагедија: Ѕвездата од „The Ring“ и „Lilo & Stitch“ почина на 35 години, живеела како бездомничка

Филмските фанови се шокирани по веста за смртта на Дејви Чејс, актерката која најмногу се прослави како ужасувачката Самара Морган во хоророт „The Ring“ и како гласот на Лило во анимираниот филм „Lilo & Stitch“.

Според информациите кои првично ги објави TMZ, Чејс починала во болница во Лос Анџелес на 35-годишна возраст. Нејзиниот дечко, Рој Хернандез, потврди дека таа починала од менингитис и повеќе сериозни инфекции на крвта кои довеле до сепса со фатален исход.

Неколку недели пред смртта, Дејви била хоспитализирана поради тешка неухранетост. Додека сè уште се лекувала, нејзиниот дечко започна кампања на GoFundMe, каде што откри дека нејзината состојба станала критична:

„Дејви Чејс, мојата девојка, отсекогаш била светлина во мојот живот. Многумина ја знаат како талентирана детска актерка од „Lilo & Stitch“, „Spirited Away“ и „Donnie Darko“. Но, зад затворени врати, таа се соочи со премногу тешкотии. По едно тешко детство и болно разидување со нејзиното семејство, Дејви беше малтретирана и се бореше да пронајде сигурност и среќа во центарот на Лос Анџелес. Кога се запознавме, ѝ ветив дека ќе ја штитам и ќе ѝ ги дадам љубовта и спокојот што ги заслужува. Заедно, пронајдовме моменти на среќа и надеж.

Неодамна, сè се промени. На Дејви ѝ беше дијагностициран менингитис и неколку сериозни инфекции на крвта. Нејзината состојба стана критична, а докторите ми рекоа дека можеби не ѝ преостанува уште многу време. Сè што таа некогаш сакаше беше место каде што ќе можеме да живееме заедно, да се чувствуваме безбедно и да бидеме среќни. Сега, повеќе од кога било, сакам да ѝ го пружам тоа чувство на дом и мир во нејзините последни денови.“

TMZ откри дека потесниот круг на пријатели на актерката со години се обидувал да ја пронајде откако таа исчезнала додека се соочувала со лични проблеми.

Неколку месеци пред смртта, пријателите добиле видео кое укажувало дека Дејви живее на улиците во „Скид Роу“ (Skid Row), озлогласен дел во центарот на Лос Анџелес познат по големиот број бездомници. Според изворите, таа била видно исцрпена и тежела само околу 34 килограми. Иако пријателите веднаш се упатиле кон таа локација, таа веќе била замината, а нивната повеќенеделна потрага завршила безуспешно.

Родена во 1990 година, Дејви ја започна кариерата како исклучително талентирана детска актерка, оставајќи силна трага во филмската индустрија во раните 2000-ти.

Нејзиниот голем пробив се случи во 2002 година кога го позајми гласот на Лило во „Lilo & Stitch“. Истата година, ја одигра морничавата Самара Морган во „The Ring“, а изведбата ѝ ја донесе наградата за Најдобар негативец на MTV Movie Awards.

Големиот талент ѝ беше препознаен и преку синхронизацијата на главниот лик Чихиро во англиската верзија на јапонскиот анимиран хит „Spirited Away“. Исто така, ја глумеше Саманта Дарко во култниот „Donnie Darko“ (2001), улога што ја репризираше и во директното видео-продолжение „S. Darko“ во 2009 година. Покрај филмовите, таа имаше забележителни улоги и во телевизиски серии, вклучувајќи ја хит-серијата на HBO, „Big Love“.

Нејзиниот последен актерски ангажман беше забележан во 2016 година, по што целосно се повлече од очите на јавноста.