Фризерка доби илјадници комплименти на интернет откако успеа на смирен начин да потстриже детенце со аутизам. Фотографијата од ситуацијата беше објавена на профилот на Facebook на мајката на момчето, Џенифер, и оттогаш брзо се распространи на социјалните мрежи.
За Џенифер, потстрижувањето на нејзиниот син Ајзеја отсекогаш било проблем, бидејќи поради сензорна преосетливост, тој не дозволувал никакви звуци во близина на неговите уши. Најчесто посетите во фризерски салон за нив завршувале неуспешно сè додека не го посетиле салонот на Кејлин во Чарлстон.
Упорната фризерка седнала на подот со Ајзеја и низ разговор со него успеала да му ја скрати косата. Прочитајте го текстот на Џенифер наменет за добродушноста на Кејлин:
Оваа жена, Кејлин од „Sports Clips“ од Чарлстон, направи многу повеќе за моето срце одошто веројатно си мисли. Потстрижувањата со Ајзеја не се мали подвизи. Тој мрази да има нешто во близина на неговите уши, па звукот на ножиците го фрла во паника... оваа вечер не беше поразлична. Бев подготвена да се откажам, но таа не беше. Таа седна на подот со моето дете во скутот и му ја потстрижа косата. Разговараа за Дори и Божиќ и таа дури му дозволи да ја испрска со нејзиниот спреј со вода.
Аутизмот може да биде многу, многу тежок, но ваквите личности ни ги прават деновите малку полесни.