Јаткастите плодови секогаш присуствуваат на листите за супер намирници кои се корисни за здравјето. Па, очекувано, истражувањата само ги надополнуваат причините поради кои треба да ги консумираме крцкавите јаткасти плодови.
Шпански научници сега за првпат откриле врска помеѓу консумирањето јаткасти плодови и зголемувањето на серотонинот, супстанција која го намалува апетитот, ја зголемува среќата и го подобрува здравјето на срцето.
Јаткастите плодови го штитат срцето
Истражувачи од Универзитетот Барселона тврдат дека дневно се доволни само 30 грама сирови и неизлупени ореви, бадеми и лешници за да се забележи позитивниот ефект.
Се верува дека резултатите од истражувањето ќе најдат примена во создавањето на поефективни третмани за пациентите со метаболички синдром, кој се карактеризира со вишок масни наслаги на стомакот, висок крвен притисок и високо ниво на шеќер во крвта. Сите тие симптоми го зголемуваат ризикот од кардиоваскуларни болести и дијабетес тип 2.
Во меѓувреме, друго истражување чии резултати биле објавени во списанието „Nutrition and Cancer“ покажало дека оревите најверојатно го намалуваат ризикот од рак на дојка.