За првпат во историјата, возрасна голема бела ајкула е снимена под вода во нејзиното природно живеалиште во Средоземно Море.
Фасцинантниот момент беше документиран од волонтери на невладината организација „Healthy Seas“, кои во тој момент работеле на чистење на напуштени рибарски мрежи во близина на потонат брод. Експедицијата се одвивала во Сицилијанскиот Проток, поточно на отворено море помеѓу Тунис и Сицилија.
Нуркачот Дерк Ремерс, кој успеал да го улови овој историски кадар, не ја криеше својата возбуда пред медиумите:
„Статистички гледано, многу поголема е веројатноста да го добиете џекпотот на лотарија, отколку да сретнете вакво иконско животно под вода. Поминувате децении нуркајќи по остатоци од бродови и отстранувајќи мрежи, но ништо не може да ве подготви за ваков момент. Прстите ми трепереа додека се обидував да ја вклучам камерата.“
Видео
Иако големите бели ајкули низ годините ретко биле забележувани на самата површина на Медитеранот, ова е прво видео на кое е прикажан мажјак во природната средина.
Научниците нагласуваат дека нема простор за загриженост кај туристите и капачите, бидејќи единката била забележана на голема оддалеченост од брегот, длабоко во отворено море.
