„Го сакам твојот дрес од 5 години“: Никола Митревски му исполни желба на девојче по пласманот на Македонија на СП
Големата победа над Словачка и новиот пласман на Македонија на Светско првенство донесе и еден сладок момент кој за едно девојче беше остварување на сон.
По натпреварот во СЦ „Борис Трајковски“, додека ракометарите го славеа успехот со навивачите, вниманието го привлече малата Лена која во рацете држеше порака упатена до голманот Никола Митревски. На нејзиниот транспарент пишуваше дека од својата петта година сонува да го добие неговиот дрес.
Желбата на слатката навивачка не остана незабележана. По натпреварот, во лобито на хотелот, Митревски лично ѝ го подари дресот, а моментот предизвика бројни реакции на социјалните мрежи.
