Селин Дион се подготвува повторно да се врати на сцената во Лас Вегас, по неколкумесечна пауза. Музичката ѕвезда минатата година ги откажа сите ангажмани за да може да се грижи за својот сопруг Рене, кој води долга битка со рак на грлото.
Како последица на лекувањето, Рене има проблеми со слухот, не може да зборува и се храни преку цевка. Во неодамнешно интервју за ABC News, Дион низ солзи ја опиша состојбата на својот 73-годишен сопруг. „Тој не може да ја користи устата. Не може да јаде, па јас го хранам. Тој се храни преку цевка. Морам да го хранам трипати дневно. Го правам тоа сама, го хранам него, па им давам јадење на децата“ – изјави 47-годишната пејачка.
Селин и Рене се во брак 20 години и имаат три деца – 14-годишниот Рене-Чарлс и 4-годишните близнаци Еди и Нелсон.
Идејата Дион да продолжи со настапите во Лас Вегас била на Рене, кој беше нејзин менаџер уште од самиот почеток на нејзината кариера. „Тој сака повторно да пеам, а јас сакам да го направам ова за него. Рене ќе биде во публиката. Ветувам дека ќе има високи, среќни ноти, но тоа ќе биде многу емотивно за мене“ – рекла Селин.
Во интервју за People, Селин признала дека се плаши од најлошото. „Се плашам да не го изгубам, бидејќи состојбата е лоша. Но, морам да си покажам себеси и да им покажам на мојот сопруг и моите деца дека сум силна и дека сме добро“ – изјавила таа.