Карл Лагерфелд повторно ја воодушеви публиката со неговата колекција висока мода есен/зима 2011-2012. Тој го пресоздаде познатиот плоштад „Вендом“, прикажувајќи ја архитектурата со неонски светла и поставувајќи статуа на чиј врв наместо Наполен, се наоѓаше Коко Шанел.
77-годишниот дизајнер ја спои софистицираната елеганција со готик детали, за да создаде неповторливи женски костуми со сукња од поросен твид и волна. Тој го надополни изгледот на манекенките со кожни ракавици со отворени прсти и тенка чипкаста мрежа преку нивните очи.
Ревијата изгледаше како ѕвездите да се истурија од вечерното небо на пистата.
Во модните кругови се шират гласини дека ова можеби е една од последните ревии на Лагерфелд и се шушка дека 2012-та е годината кога прочуениот германски дизајнер ќе се пензионира. Но, ваквите информации засега немаат никаква потврда.
Од првиот ред поддршка на Карл му дадоа Алекса Чанг, Даен Кругер, Мила Јовович и младата Ели Фенинг.
