Ели Сааб експериментира на нови модни територии, сè почесто оддалечувајќи се од својата успешна формула за создавање на беспрекорно елегантни креации во кои секоја жена би се чувствувала како гламурозна божица.
Со колекцијата pre-fall 2016, Сааб плива во кежуал води, инспирирајќи се од лондонската модна сцена во доцните 60-ти години. Црната боја и тантелата се доминантни елементи, кои танцуваат заедно кај повеќето од фустаните. Крзнените елеци, здолништата и наметките со долги реси, женствените комбинезони и романтичните панделки на вратот на префинет начин го доловуваат шармот на бохо стилот.
Во ателјето на либанскиот дизајнер очигледно е отворен голем простор за новитети кои досега никој не би ги асоцирал со името Ели Сааб. Кој можеше да претпостави дека оттаму ќе излезат гумени чизми и лежерни влечки?
