Зухаир Мурад поседува талент кој му овозможува да ги претвори женските модни фантазии во реалност. Креациите со негов потпис сè почесто се присутни на холивудските свечености, а сè повеќе славни дами влегуваат во големиот круг на негови обожавателки.
Либанскиот дизајнер денес обелодени што се креираше во неговото ателје во изминатиов период. Меѓусезонската колекција е базирана на модерна женственост, а збогатена со декоративни елементи инспирирани од флората.
Мурад експериментираше со хипнотизирачкиот ефект на црно-белите риги, си поигра со транспарентноста и ја искористи безвременската убавина на едноставните кроеви. Елегантни фустани, модерни комбинезони, здолништа тип „молив“ и панталони со прав крој ја скокоткаат женската љубопитност. Покрај класичната црна и бела боја, во колекцијата го задржуваат погледот и софистицирани розови, сини и тиркизни нијанси.
Мурад пред еден месец се закити со наградата Моден визионер, која му беше доделена на Elle Style Awards Elidor 2014 во Истанбул.