Француската ривиера ги примами филмските ѕвезди по 68-ми пат да го прослават отворањето на Канскиот филмски фестивал.
Француската драма „La Tête haute“ со Кетрин Денев во главната улога беше избрана да го отвори престижниот фестивал кој ќе трае до 24 мај. Филмот е во режија на Еманиел Берко. Ова е вторпат во историјата на фестивалот на отворањето да биде прикажан филм режиран од жена.
Браќата Коен ќе бидат претседатели на жирито, а вкупно 19 филмски остварувања ќе се натпреваруваат за наградата „Златна палма“.
На црвениот тепих на првиот ден од фестивалот зачекорија многу славни дами. Лупита Нионго весело го вееше својот зелен плисиран фустан од Гучи, Наоми Вотс блескаше во раскошен фустан од Ели Сааб, Дауцен Крус и Карли Клос заведуваа со креации од Версаче, Фан БингБинг изгледаше занесно во креација од високата мода на Ралф и Русо, додека Натали Портман шармираше во елегантен црвен фустан од Диор.
Џулиен Мур привлекуваше комплименти од модните критичари со екстравагантна креација од Армани, Изабела Роселини носеше креација со наметка од Стела Мекартни, а Кетрин Денев избра двобоен фустан од ателјето на Жан Пол Готје.
