Доделувањето на музичките награди на Billboard донесе голема возбуда на сцената, но ѕвездите на црвениот тепих повеќе разочараа отколку што воодушевија. Сепак, некои од нив успеаја да добијат позитивни коментари од модните критичари.
Ријана ги изненади своите обожаватели со бел костум на Max Azria и кошула со остро V деколте. Таа одлично го комплетира својот изглед со обувки на Christian Louboutin и накит на Neil Lane.
Девојката на Џастин Бибер, Селена Гомез, покажа малку попровокативен изглед во долга црна тоалета на Dolce & Gabbana со отсечоци на половината. Благодарение на високиот шлиц, се ѕиркаа нејзините црвени сандали на Giuseppe Zanotti.
Бијонсе избра не особено впечатливо мало црно фустанче на Lanvin, но затоа пак избра блескави чевли од Christian Louboutin.
Ферги, доследна на својот стил, се појави во футуристичка креација од линијата Herve Leger by Max Azria, а ја искомбинира со гламурозна чантичка на Alexander McQueen и екстра високи обувки од Christian Louboutin.
Кели Роланд максимално ги истакна своите облини со супер тесен фустан на Herve Leger во впечатлива циклама боја.
Мери Џеј Блајџ ја покажа својата „дива“ страна со долга тоалета на Marc Bouwer со леопардски принт.
Ke$ha се обиде да постигне поженствен изглед со помош на интересна тоалета на Jad Ghanour, а Ники Минаж не ја пропушти ниту оваа можност да ги покаже облините со кои се гордее и се појави во тесна креација на Mark Fast.
Како и секогаш, Тејлор Свифт блесна во гламурозна тоалета, овој пат од Elie Saab. Кајли Миног за свеченоста избра фантастичен краток црн фустан на Alexander McQueen и црни обувки на Christian Louboutin.
