Откако ги задоволи желбите на модерните девојки со својата капсулна колекција обувки „Jet Set 6“ за летниот период, Мајкл Корс ги засука ракавите и повторно креира мини-колекција за џетсетерки кои и во студените есенски денови влегуваат во динамични авантури на разни локации од светот.
„Jet Set 6“ се состои од шест пара обувки кои го комплетираат изгледот на секоја дама која често патува, независно од пригодата.
Златни сандали за луди и незаборавни вечерни излегувања, комфорни и лесни слипери за безгрижни прошетки, чизмички во рок стил за истражувања на нови туристички локации, црни штикли за елегантни забави, чизмички на штикла до глуждовите и црно-кафеави чизми за ладните и врнежливи денови.
Атрактивниот ангел на „Victoria’s Secret“, Лили Олдриџ, отпатува во Париз каде ги прошета новите шик обувки низ улиците на француската престолнина и сними промотивна фотосесија. Познатата манекенка беше ѕвезда и во претходната кампања за летната колекција на Корс, снимена во Рио де Жанеиро.
