Со концертот на Libercuatro tango ensemble, вечерва беше отворен Фестивалот на музика од светот во Битола.
Директорката на Центарот за култура, Маја Андоновска-Илијевски, одржа краток говор, а Љубица Ангелкова го најави српскиот квинтет кој го означи стартот на 13-тото издание на музичкиот хепенинг.
Талентираните музичари ја доловија магијата на танго музиката.
Селекторот Владимир Димовски годинава се одлучи за програма која ќе биде патување од танго, преку џез, до етно звуци од Балканот и македонски шлагери, како и вклучување на електронската музика во неофицијалната програма.
„Музиката ја има таа моќ да нè прошета низ минатото, сегашноста и иднината, да ни открие цели светови и да нè сокрие во еден подобар универзум. Нашиот фестивал силно ја прегрнува музиката од светот, и го отвора срцето на градот, претворајќи го во лулка на уметноста. Во трите фестивалски денови ќе се слеат различни музички правци, а нашиот фестивал ќе стане пристаниште на домашни и странски уметници кои го говорат универзалниот јазик на музиката“ – порачува Андоновска-Илијевски.
Утре ќе настапи Билјана Биља Крстиќ, придружувана од Камерниот оркестар на Битола, а последната музичка вечер ќе слушнеме македонски евергрини во изведба на Бојан Стојков, Димитар Андоновски, Јасна Димитровска, Зарина Прва Севда, Тамара Стојковска и Нико Ѓоргиевски на концертот на Битолскиот дувачки оркестар.