Како што се наближува премиерата на новото продолжение на вампирската сага Twilight, така верните обожаватели сè поактивно тргнуваат во потрага по повеќе информации за главните ликови. Списанието Гламур реши да ѝ го даде тоа задоволство на публиката, па британското издание на ова женско списание ги прогласи Роберт Патинсон и Тејлор Лотнер за најсекси мажи, а американското издание на својата насловна ја претстави Кристен Стјуарт.
21-годишната актерка позираше во прекрасни парчиња облека на Стела Мекартни, Ботега Венета, Гучи и Александар Ванг, а направи и интервју во кое сподели колку ѝ било тешко за време на последното снимање на Twilight.
„За време на последната ноќ од снимањето, јас буквално си ја кубев косата и плачев, па морав да заминам накратко затоа што останав без глас“ – изјавила таа.
Како и секогаш, Кристен не откри ниту малку за нејзината тајна врска со Патинсон, но призна дека кога станува збор за гледање на филмовите Twilight, подобар партнер е Тејлор Лотнер.
„Првпат го гледав Breaking Dawn со Тејлор. Беше навистина забавно. Забавно е да го гледаш со него затоа што навистина седиме и гледаме. Јас и Тејлор сме обожаватели на Twilight, па можеме да седиме и целосно да бидеме навлечени на тоа. Од друга страна кога седам со Роб... му се допаѓа, но тој има толку поразлична енергија“ – признала таа.
Кога била запрашана за совет за врските, привлечната бринета одговорила: „Хм... добар љубовен совет за мене е да си искрен и да се познаваш себеси“.