Ревиите на Диор се вистински рај за очите. Кога во јули Раф Симонс за првпат се поклони за престижната модна куќа по презентирањето на колекцијата висока мода, ревијата остана запаметена по ѕидовите полни со цветови и футуристичката шминка. На последната ready-to-wear ревија на Диор за сезоната пролет/лето 2013, освен креациите, погледите на присутните ги зароби и колоритната блескава шминка на очите на манекенките.
Шминката во боите на виножитото наречена „Techno Butterfly“ е дело на мејкап гуруто Пет МекГрат. „Изгледот Techno Butterfly го привлекува вниманието кон очите со интензивни геометриски бои, декорирани со експлозија од сваровски кристали во слични или контрастни бои“ – изјавила таа.
Секој кристал бил рачно лепен на очните капаци на манекенките. Веѓите, трепките и усните имаат неутрален природен изглед со цел да дојдат до израз очите.
